يعيش اللبنانيون على وقع “رعب” فرض ضرائب جديدة تزيد الخناق على قدراتهم المالية المحدودة أصلاً باستثناء قلة قليلة تنعم بفيض الاموال وتستفيد من هول الفساد المستشري في كل مفاصل الدولة. ففي مشروع قرار الموازنة الذي تناقشه الحكومة ضجت وسائل الاعلام باخبار ضرائب اضافية ان كان الضريبة على القيمة المضافة tva او زيادة تعرفة الكهرباء وصولاً الى ضرائب جديدة على الكحول وغيرها…
هذا الواقع الخطير دفع باللبنانيين للتفاعل بقوة عبر مواقع التواصل الاجتماعي فانطلقت حملة #مش_رح_ندفع التي رفضت اساسا فرض رسوم اضافية تثقل كاهل اللبناني لتواجَه بعدها بحملة مضادة قادها بشكل اساسي مناصرون للتيار الوطني الحر فاتخذ الصراع الالكتروني بعدا سياسياً لا سيما وان من ابرز داعمي حملة “مش رح ندفع” عباس زهري وهو الناشط المقرب من “حزب الله” ليتحول النقاش الى مواجهة الكترونية بين الطرفين.
الناشط عباس زهري كتب: “للزعماء بنقول #طلعت_ريحتكم وللنواب بنقول #لا_للتمديد واي ضريبة جديدة #مش_رح_ندفع”. واضاف: “عملنا سكر خطك قالو هيدي ضد تيار المستقبل ، عملنا #مش_رح_ندفع قالوا هيدي ضد العونية انو بنعمل حملة ضد السنافر مثلا ؟”. وقال علي زين الدين “#مش_رح_ندفع ولا ضريبة، ليش شو جاينة بالمقابل؟ لا كهربا لا مي لا امن لا حدائق عامة لك ولا شي…”.
فادي غصن كتب: “بدل ما تزيدوا ضرائب على الكهربا والموتيرات خفضوا معاشات هالنواب والوزرا يلي لا شغلة ولا عملة وهني بحد ذاتهن عالة على الدولة”. وذكر حساب سمعان الساخر: “الموضوع مش #مش_رح_ندفع او #بدنا_ندفع الموضوع كيف الهن عين يغلو الاسعار !!؟”
وقلت لطيفة خليل: “#مش_رح_ندفع يلعن إخت هالبلد رفعوا تسعيرة الكهرباء ١٠٠٪ وهيي أصلاً ما بتجي.. وشعب نايم بس بيتذكر يقوم اذا حدا دقلوا ب زعيمه .. الله لا يقيمكن”، فيما ذكرت وعد هاشم: “بتخوفونا بالرموز الي ما بيندق فيا، الكهربا و الخبز و المي هني الرموز الاساسية و المشتركة لكل اللبنانيين #مش_رح_ندفع”. واوضحت فاطمة: “صح نحنا ما النا خصة بالهاشتاغ لأن كهربتنا اربعاوعشرين ع اربعاوعشرين بزحلة.. بس منتضامن مع اللي ما عندهن اسعد نكد و EDZ”.
كما شارك العديد من المغردين فيديوهات عن وعود كان قد اطلقها وزراء الطاقة في السنوات الأخيرة بشأن تأمين الكهرباء.
ويبدو ان هذا الهاشتاغ استفز مغردين مؤيدين للتيار الوطني الحر الذي ردوا بهاشتاغ “#رح_ندفع”. فقال كارلوس شامي: “#بدنا_ندفع لنوقف النزف لي عم تدفعه الخزينة سنويا لتغطية العجز المالي وعم يتجه تصاعديا ليبلغ اكثر من مليار و250 مليون دولار. وذكر راي سبلاني: ” #بدنا_ندفع كرمال كم واحد أزعر وكم كلن بلا ضمير يعبوا جيابهم وحساباتهم. 70 مليار!!! بعمروا بلد”.
اما حساب ابو تراب فكتب: “ياخيي يلي بدو يدفع .. يدفع ويلي مابدو يدفع .. مايدفع بس كونوا اكيدين ٩٥ ٪من المسؤولين مابيدفعوا !#بدنا_ندفع #مش_رح_ندفع”.
كما تضمن الهاشتاغ كذلك انتقادات لمن يروج له فكتب محي الدين: “اول مرة بعرف إنه في فئة من الشعب اللبناني تتمتع بحقارة وتبعية فوق العقل؛ يعني منحبكجية بشار ما وصلت لهذا المستوى شيء مقزز قال #بدنا_ندفع قال”. كما ذكر علي حمود: “#بدنا_ندفع مش كل انسان بيوقف بوجه الضرائب بيكون ضد الرئيس أو ضد تيار الوزير الشعب مش قادر يتحمل ضرائب جديدة”. واعتبر قاسم #سكر_خطك: “بس تسكنو بمناطق بتجي فيها الكهربا 4 ساعات تبقو قولو بدكن تدفعو شعب عياش”.
فبين “مش رح وندفع” و”بدنا ندفع” الى ان يندفع البلد؟