هل تذكرون الطفل الذي ظهر في فيديوهات عن مدرسة الحكمة اثارت الاهتمام والجدل وحتى نالت نصيبها من السخرية من البعض الذي هاجم الطفل بسبب شكله أولا؟
عاد الطفل مارون قزي ليحتل مواقع التواصل الاجتماعي مجدداً إنما هذه المرة عبر مجموعة من التدوينات لناشطين تحدثت عن “وضعه الصحي والمعاناة الكبيرة التي يعيشها” لكن ما لبثت ان تغيرت المعطيات عبر تأكيد طبيب الطفل ووالده انه بخير!
فكيف بدأت القصة؟
نشرت المدونة أميرة متى على صفحتها قصة الطفل مارون حيث كتبت: “اذا حدا عبالو يعمل خير بفترة الصّوم، هيدا انسان بيستاهل نساعدو. مارون قزّي، شب زغير يمكن بتعرفوه من ورا الفيديو يلّي بينزّلن على فيسبوك. هالصّبي قصّتو قصّة. كتار بيناتنا تمسخرو عليه انو ناصح او من بعد القتلة صار وجّو مورّم. لأ هالصبي مريض.
مارون بيعاني من مرض وورم، وكل اسبوع بينصح 5 كيلو من ورا الكورتيزون. بأغلب الأوقات ما بيكون واعي على شي لأنو المورفين بيخلّيه ما بقا يحسّ بشي ومش واعي لحو. بيّو مش قادر يعالجو، وإمّو توفّت من فترة زغيرة بسبب السّرطان، وعندو خيّ اخرس موجود بالكفاءات.
اللي بيشوف مصيبة غيرو بتهون عليه مصيبتو. اذا قادرين تساعدو مارون وعيلتو ما تتأخرو. التفاصيل وقيمة العمليّة رح نعرفها قريباً.
بتمنّى ع الزّملا الاعلاميين وكل مين بيقدر ينشر هالقصّة ما يتأخّر. خلّو صيامنا يكون الو طعمة محبّة حقيقية هالسّنة”.
بدوره نشر الناشط ذو الفقار حركة معلومات عن قزي وكتب: “من وقت بلش ينزل فيديوات و الناس صارت تتمسخر عا شكلو و عا نصاحتو … كنت عارف انو هل صبي اشبو شي او صاير معو شي مصيبة بحياتو و تاكدت من هل شي بس فتت شفت صفحتو و كومنتات اهلو و دعواتهن الو بالشفاء … بس ما حبيت اعطي مواعظ للعالم اللي صارت تستلمو او الصفحات البلا مخ اللي عملت منو مسخرة لهل صبي … بالحقيقة هيدا الصبي اسمو مارون قزي … و عندو ورم و مضطر كل جمعة ينصح خمسة كيلو من ابرة الكورتيزون … مارون توفت امو بنفس المرض من فترة كتير قصيرة و ابوه ما قادر يعالجو …
مبارح لاول مرة بفرح ببوستات عا فايسبوك خصهن بهل صبي … هل بوستات بيدعو لحملة تضامن انساني بحت … يا ريت الكل يدعم مارون بالكلمة الحلوة … ومش بالمسخرة او بالتفاهة عا شي عم يعملو هل صبي لا ارادياً بسبب حالة الهلوسة اللي مرات بتصيبو جراء ابرة المورفين … بعتقد انو نضوي عا حالة مارون يا اعلامنا اهم و ابدا من ميريام كلينيك و تفاهاتها ! #سلامة_قلبك_يا_مهضوم”.
وتفاعلت الاعلامية ديما صادق مع قصة مارون فكتبت: “مارون حبيبي . حابة قلك شغلة مع اني ما بعرفك بس شفتك كذا مرة عالفايسبوك : انت صبي كتير مهضوم . كتير كتير ما شوي . كل ما شوف الفيديو اللي لالك بضحك من قلبي و بتخلليني بلش نهاري بفرح . بدّي أشكرك كتير على عل شي . و بدّي قلك انو خدودك الموردين خلو وجك بيدخل عالقلب بسرعة ، كيف الأولاد المهضومين المعجعجين اللي منشوفن بالافلام و دغري بفوتو عقلبنا . انت متلن، هلقد مهضوم ❤. بتمنى اذا حدا بيعرفك يوصلك هالرسالة، لانو انا و كتار ناس شفناك عل فايسبوك و دخلتلنا الفرحة عقلوبنا قد ما انت طيوب . ميرسي كتير على الفيديوهات الحلوة . و بدّي قلك شي اخير : انت مش بس مهضوم متل اولاد الأفلام ، انت كمان بطل متل الأبطال القوايا اللي منشوفهن بالسينما . انت بطل كتير حلو و نحنا كتيييييير بنحبك . خليك قوي حبيبي . و تذكر دايما انك بطل و الأبطال قلال بالدنيا . منحبك. ملاحظة : شكرا عتفاعلكم مع البوست . بس بتمنى اي كومنت يكون في دفع إيجابي و تشجيعي مش شعور بالحزن. شكرا كتير “.
وقد شارك آلاف المدونين والناشطين ورواد مواقع التواصل القصة داعين الى اوسع حملة تضامن مع حالة مارون وعائلته.
لكن لاحقاً أوضح الطبيب المعالج للطفل ان مارون يعاني من مرض نادر يوقف انتاج الدّم، وقد تلقى علاجات عدّة استجاب جسمه حديثاً لها، بحيث نجح العلاج الاخير باستقرار حالته الصحيّة والحفاظ على دمائه داخل جسمه وهو ليس بحاجة للسفر للعلاج في الخارج او اي مساعدة أخرى…
