نشر الأب مجدي علاوي عبر صفحته على “فيسبوك” “Bonheur du Ciel” avec père Majdi Allawi سعادة السماء مع الأب مجدي علاوي” صورا لقطع الكهرباء عن فرن “الفقراء” ولبعض المواد الغذائية التي تضررت بفعل هذا القطع.
وعلقت الصفحة على الصور: “قطعولنا الكهربا بفرن الفقرا، قطعولنا الكهربا عن 600 ولد بيقصدو الفرن تبعنا حتى ياكلو منقوشة الصبح لأنو ما معن ياكلو، قطعولنا الكهربا عن فرن بيطعمي 120 ختيار بدن ياخدو الدوا… ومجبورين ياكلو قبل الدوا…
نعم، بدل ما هني يطعمو الفقرا… قطعولنا الكهربا…”
وتابعت: “اعتبرو هالفرن ممتلكات خاصة لشي نايب او وزير… اعتبروه حفلة خاصة… اعتبروه عرس من أعراسكن الفاخرة الفاحشة… اليوم قطعتو الكهربا… وكل اغراضنا راحت للكَب… وأنا وعم كبُّن… عم فكر فيكن واحد واحد… عم فكر بفواتير الكهربا يلي بمناطق معينة ما بتندفع… عم فكر بولادي الواقفين ناطرين ياكلو عالباب”.
وأضافت: “نحنا بزمن الإقطاع… بزمن الفساد… بزمن الفجور السياسي… جايي يوم الدينونة والحساب… وهناك البكاء وصريف الأسنان…صدقوني… ولادي والختيارية عباب الفرن… مش قادر خبّرن إنو دولتي قطعت الكهربا… يا ويلكن من دعوة الفقير… يا ويلكن… وأحلى شي حاطين رقم تلفون وخط ساخن… عم ندق عليه ما حدا بيرد، أبدعتو بالنفاق، أبدعتو”.
ولفت علاوي في التعليقات إلى أن قطع الكهرباء تم بدون إنذار والسبب يعود لخطأ في الساعة، قائلاً: “عم ندفع اللي علينا ولكن تبين اننا عم ندفع عن غير ساعة، والحق على الدولة”، مشيراً إلى أن “هذه الحادثة تتكرر للمرة الثالثة”.
