أعلنت الإعلامية في قناة الـ”LBCI” غريسيا أنطون إصابتها بفيروس “كورونا”.
وكتبت، على حسابها على “فيسبوك”: “من شباط اشتغلت كتير ع تقارير وشاركت ببرامج وحملات توعية من فيروس كورونا. حكيت عن والدي وعن الخوف والمسؤولية. اليوم عم عيش كل شي حكيت عنو.. بس بإيمان كبير إنو مرحلة ورح تمرّ”!
وأردفت قائلةً: “من باب الحرص على سلامة جميع اللي خالطن بالأيام الماضية. مبارح عملت فحص الـPCR واليوم تبلغت إني مصابة بفيروس كورونا. العوارض بدأت بشكل كتير خفيف مسا الاثنين واشتدت مسا الثلاثاء بشكل سريع ومتعب. ومن وقتها أنا بغرفتي محجورة ورح ضل محجورة 14 يوم”.
وأضافت: “تعبانة؟ إيه. موجوعة؟ كتير. خيفانة؟ أكيد.. بس مش ع حالي. ما عم وقف بكي، ما بعرف إذا من الأوجاع أو من الخوف ع أهلي وع بيت جدي. اشتريت كل أنواع الأدوية وناطرة الفرج.. فرج مفروض عمرو 14 يوم”.
وتابعت: “بهالـ14 يوم كان مفروض كون عم بستقبل وشوف خطيبي اللي صرلي 8 أشهر مش قادرة شوفو من ورا كورونا وإجراءات التسكير.. هلق بس حلحلت، كورونا دق بابي وحرمني مرة جديدة من اللي بحبن.. حتى لما صاروا قراب.. كل يوم منقول الأعداد ارتفعت بشكل خيالي وكارثي، ومنروح ومنجي حاطين هالماسك كأنو أكسسوار.. الماسك ما بيحمي بخفف نسبة إنو ننعدي.. بس مش يعني بس نلبس ماسك نحس حالنا عنا قدرات خارقة، لأنو العكس تماما”.
ومضت قائلةً: “سألوني من مين انعديتي.. جوابي كان ما بعرف لأن ع أساس حاطة الماسك أو أقله ما منسلم ولا منبوس ومنقعد بعاد ومنعقّم، والمحلات القليلة اللي عم نروح عليها ملتزمة بإجراءات وزارة الصحة، وإلا مش مفروض تكون فاتحة. الفيروس بوجّع وبيزعج.. بكفي الشعور بالوحدة.. واتصالات الرعب: مين شفتي؟ عندك حدا مريض؟ انتبهي يطبقوا الروايا! ع كل حال نصيبي.. وأوجاعي الجسدية والنفسية رح إتحملها 14 يوم.. إنتوا اتوقوا أكتر ما تستخفوا لأن اللي ما انصاب ما رح يفهم معنى الإصابة”.
وختمت بالقول: “صحتي ما بتهمني.. بتهمني صحة أهلي! رح تتلفنوا أو تحكوني تسألوني كيفك… رح قلكن منيحة”!
