الحقبة الذهبية للولايات المتحدة انطلقت، هيك بلّش الرئيس الأميركي دونالد ترامب كلمتو خلال حفل تنصيبو.
ترامب ركّز بكلمتو على الشؤون الداخلية لواشنطن، وأكد انو رح ترجع الولايات المتحدة عظيمة عن جديد.
ملفات كتيرة اجتماعية على سلّم أولويات الرئيس الأميركي، وتغيرات كتيرة رح تطال حياة الاميركيين اليومية ونمط حياتن، وحتى هوية البعض الجنسية.
الهمّ الأول الو هو مصالح الولايات المتحدة يلي ناوي يوصلها للمريخ. والسلام يلي حكي عنو، بلّش العمل عليه من لحظة فوزو بالرئاسة وأثمر عنو انتخاب رئيس جديد نظيف للجم÷ورية اللبنانية وفق تطلعات اللبنانيي للمرحلة الجايي. بالإضافة لاتفاق وقف اطلاق النار بغزة.
والرئيس جوزاف عون كان أكد خلال تهنئتو ترامب، انو واشنطن لعبت دور بارز بالانتقال لأفق جديد من الأمان والطمأنينة بلبنان.
يعني العمل على السلام بالعالم انطلق وفق اجاندت ترامب، من الشرق الأوسط، يلي عاني كتير من الحروب لسنوات كتيرة وكانت البداية من لبنان، لسوريا، لغزة.
والعين اليوم على ملف التطبيع يلي كان ترامب اشتغل عليه بولايتو الأولى، فهل رح ينجح ترامب مطرح ما فشل بايدن بالتطبيع السعودي الإسرائيلي؟
