هوّر يابو الهوّارة/ عن شيعة السَّفارة/ نصرالله بدو طرشان/ وخرسان عن جدارة…
وهوّر يا سيّد تنشوف/ صار الحكي عالمكشوف/ اللبناني منّو خروف/ ولا مخبّى براس الملفوف/ ولا بيقبل ضرب الكفوف/ ولا بيخاف الهَوْبرا…
وهورّ يا مهوّر كمان/ هالسياسة من زمان/ يا بتتخلوا عن لبنان/ وبتمشوا ورا إيران/ يا مندمّر هالكيان/ قد ما كبرت الخسارة…
وهوّر يا مهوّر إيران/ خلصت قصّتها بلبنان/ وعنّا ما إلها عنوان/ احترقو وراقا من زمان/ وانكشفو جنودا كمان/ اللـ باعوا بلادن بِبارة…
وهوّر يا مهوّر تهديد/ بهزّ الاصبع والوعيد/ وبالصريخ وبالتحريض/ هيدا أسلوب المريض/ الما عندو حجة وعنيد/ وعم بيكبّر الحجارة…
وهوّر يا مهوّر تخوين/ ععمارن بدّن تأمين/ يا شحّارن هودي لمين/ رح يتشكّو عالأمين/ يا دلّن بين حين ومين/ بيودّولن سيّارة…
وهوّر يا مهوّر كلام/ مستقوي ما إلو لجام/ شو مخبّي بقلب الكمام/عم بيدهورنا لقدّام/ ذكّرنا عادل إمام/ و»السفارة بالعمارة»…
وهوّر يا شيعة لبنان/ هوّر كترت هالأحزان/ عم بيودّوا هالشبّان/ تيموتوا كرامة طهران/ هوّر تجّار الأكفان/ ثرواتن بالمليارا…
وهوّر بدّا هوّارة/ توابيتن غليت أسعارا/ وإماتن بالمرارة/ عم بتلعلع أخبارا/ لفّوهن بالشعارات/وهوّر فدا بشّارا…
وهوّر كلّا أجندات/ نووي ومفاوضات/ وخداع ومزايدات/ يا مشحّر ملّا سمعات/ تفنكات ومغامرات/ ما عم تنطفي نارا…
يا مهوّر يا صباح الشوم/ هالبلد ما كان يقوم/ ولا قادر بالدّم يعوم/ زغيّر مَعْلَم ومعلوم/ لا مبلوع ولا مهضوم/ وطعماتو متل الزقوم/ بعدو واقف بالزّلعوم/ ليوم القيامة بيدوم/ شوكة بعين الغدّارة…