من رحم الاستشهاد ولدت ثورة
وبريشي مغمسي بدم الابطال نكتب اول سطر بحكاية انتفاضة شعب.
وفاءً للشهداء… انتفض
وت يكون في محكمة وحقيقة… انتفض
بوج الاحتلال… انتفض
لإفشال المشاريع المستوردي… انتفض
وانتفض ت ما ينكسر لبنان ويكون في وطن سيد، حر، مستقل.
14 آذار، يا هـ المزروع بوجدان كل حر بهالوطن.
يا هـ التاريخ اللي خلّد ذكرى شهداء ثورة الارز بعرش السما.
يا نبض مقاوم طهّر تراب الوطن من الاحتلال
يا نهج صار عنوان للعزة والعنفوان ورمز لمسيرة نضال شعلتها ما انطفت، ولا رح تنطفي وفي روح فينا بتنبض.
بالذكرى 12 لثورة الارز، وبوقفة تأمل لواقع هـ الوطن
اللي تحصّن بوحدة شعبو وجيشو،
دمّر كل المؤامرات اللي هددت ميثاقو وكيانو، رجالات 14 آذار وتضحياتن رجّعوا للمؤسسات الحياة، ولبنان صار ورشة عمل ت يكون الوطن على مستوى الطموحات وتطلعات الاجيال الجاي ووفاءً للي استشهدوا وسلّمونا الامانة،
14 آذار، مش تاريخ بروزنامة الايام…
14 آذار، مش منصب او مسؤولية وحساب خسارة وربح…
14 آذار هي ثورة، والثورة ما بتوقف… وفي مناضلين اوفياء لها…
ونحنا أهل الوفا…
(*) عضو كتلة «المستقبل» النيابية
