ع السكت لملم وجعو وعذابو… ومشي
ع طريق الرئيس الشهيد ورفقاتو… مشي
ومثل ما بقلمو كتب فكرو وهمّو بحماية المواطن،
كتب بدمّو رسالة شهادتو… ومشي
باسل فليحان،
يا رمز للشباب اللبناني المبدع اللي رجع ع بلده من البعيد البعيد، تخلى عن أهم المراكز بأهم المؤسسات العالمية، البنك الدولي وغيرو، تخلى عن انانيتو ونجاحاتو ورجع تيخدم وطنو والانسان اللي فيه…
يا صوت صارخ حاول يحفر وينخر ويفتفت بالوشوشة صخرة الفساد بهالوطن… وترك بصمتو بقوانين لحماية المواطن وسلامة غذاءو وتنظيم الادارة بوزارة ماليتو.
باسل فليحان،
عشر سنين ع غيابك، وبعدك انت… انت
مثال للرجل المسؤول، الشريف، القريب، المحبب… انت
قدوة للطموح بخلق وطن جديد حقيقي… انت
وصاحب الرؤية اللي بتخلدك مع الكبار.. انت
بذكرى استشهادك منجدّد الندر انو مارح يهدالنا بال الا ما يكون في حقيقة وعدالة ووطن سيد، حر، مستقل.
يا رفيق المعركة والنضال،
بضوّي شمعة قدام عرشك الابدي، وانت من فوق برفقة سيد الشهداء، وأبو طارق والبقية، غْمرونا بصلواتكم لأنو اللي متلكن دورن ما بيخلص ع هالارض..