بغيابك، ام تي في الليلة رح تكتب وتحكي لغتك . السنة سودا بتاريخنا . كبارنا عم يروحو وما حدا عم يعبي مطارحن . بعد وديع الصافي وصباح إجا دور سعيد عقل شاعر لبنان اللي غطا مية سنة من عمر الوطن ولمع متل قوس قزح . انطفى جسدو عن مية وسنتين . شاعر قدموس ورندلى وأجمل من كلى والشاعر اللي نادى باللغة العامية وابتدع الكتابة بالحرف اللاتيني إنسلخ اليوم عن الوطن يللي إبتدعو . وبحث وفتش كتير ليكتب عن أمجادو . هيك بلبنان إن حكى فند سعيد عقل امجاد لبنان ويمكن ومش يمكن اكيد بعد هالمسيرة الطويلة صار سعيد عقل فصل كبير بكتاب امجاد لبنان .
اضافة للانشغال بغياب سعيد عقل، الاهتمام تركز اليوم على قضية العسكريين المخطوفين. قبل الضهر كان في مواجهة بين القوى الأمنية والأهالي بسبب قطع طريق الصيفي . مع ذلك بقي الأهالي على موقفن وجددو اقفال طريق الصيفي بعد الضهر . بهالوقت ازدادت المخاوف من تنفيذ جبهة النصرة تهديدا بقتل العسكري علي البزال .
سياسيا القرار الصادر عن المجلس الدستوري برد طعن التيار الوطني الحر ما شكل مفاجأة . بالمقابل تحدثت معلومات عن اتصالات اقليمية ودولية للتوصل الى انتخاب رئيس جديد للجمهورية .
