مقدمة نشرة أخبار الـ”mtv” المسائية ليوم الخميس في 31/12/2020

مسا الخير.. بعد أربع ساعات و 15 دقيقة بتصير الساعة 12. عملية تسليم وتسلم رح تصير بين ال 2020 وال 2021. سنة النحس رح تستسلم، ورح تقدم الـ 2021 اوراق اعتمادا للبشرية الناطرا ساعة الخلاص . بس برغم كل سلبيات السنة اللي عمنودعا، بتبقى فيها علامات مضيئة، أبرزها الجيش اللبناني والقوى الامنية والدفاع المدني وفوج اطفاء بيروت والصليب الاحمر والجسم الطبي التمريضي وقوى المجتمع المدني . هودي كلن وقفو بوج الانهيار المؤسساتي والاهتراء الاداري والفساد السياسي. المسؤولين خربو وهني عمرو. المسؤولين جرحو وقتلو وهني داوو الجروح .المسؤولين جوعو الناس وقهروهن وهني كانو رغيف الخير ومعجن البركة.المسؤولين باعوا الدولة والوطن وهني حافظو بقوة الايمان على ما تبقى من الدولة والوطن . الليلة ما رح نغرق بلعبة المسؤولين غير المسؤولين ، ورح نهدي النشرة الاخيرة بسنة الـ 20 20 للجسم الطبي والتمريضي اللي واجه باللحم الحي كارثتين أقوى من بعض : فيروس كورونا وانفجار المرفأ . نشرتنا الليلة هيي تحية خاصة من قسم الاخبار بالـ MTV للاطبا والطبيبات، للممرضين والممرضات ، للمسعفين والمسعفات، يللي صمدو، وقاومو، وتحدو، وكانو ابطال بزمن الهزائم واقوياء بزمن الانكسارات . فتحية من الـ MTV للجيش الابيض يللي واجه الواقع الاسود . الليلة نشرتنا الها عنوان واحد : يا ابطال لبنان ، شكرا.